ਸੰਤ ਈਸ਼ਰ ਸਿੰਘ ਕਬੱਡੀ ਅਕੈਡਮੀ ਰਾੜਾ ਸਾਹਿਬ ਦੀ ਟੀਮ ਦੇ ਧਾਵੀ ਕੀਪਾ ਸੱਦੋਵਾਲ ਨੇ ਪੰਜਾਬ ਦੇ ਕਬੱਡੀ ਸੀਜ਼ਨ ਦਾ ਪਹਿਲਾ ਸਥਾਨ ਪ੍ਰਾਪਤ ਕਰਕੇ ਕਰਵਾਈ ਬੱਲੇ-ਬੱਲੇ।

ਕੀਪੇ ਸੱਦੋਵਾਲ ਦਾ ਜਨਮ 16 ਫਰਵਰੀ 1982 ਨੂੰ ਮਾਤਾ ਬਲਜੀਤ ਕੌਰ ਦੀ ਕੁੱਖੋਂ ਪਿਤਾ ਸ: ਦਰਸ਼ਨ ਸਿੰਘ ਦੇ ਗ੍ਰਹਿ ਪਿੰਡ ਸੱਦੋਵਾਲ ਜ਼ਿਲ੍ਹਾ ਬਰਨਾਲਾ (ਪਹਿਲਾ ਜ਼ਿਲ੍ਹਾ ਸੰਗਰੂਰ) ਵਿਖੇ ਹੋਇਆ। 1998-99 ਵਿੱਚ ਅਧਿਆਪਕ ਬਲਵਿੰਦਰ ਸਿੰਘ ਚੰਨਣਵਾਲ ਦੀ ਬਦੌਲਤ ਸਕੂਲ ਵਿੱਚ ਕਬੱਡੀ ਖੇਡਣੀ ਸ਼ੁਰੂ ਕੀਤੀ। ਇੱਕ ਸਾਲ ਨਿਰਭੈ ਸਿੰਘ ਡੀ.ਪੀ.ਏ. ਝੋਰੜਾਂ ਤੋਂ ਕਬੱਡੀ ਦੀ ਕੋਚਿੰਗ ਲਈ ਅਤੇ ਉਸ ਤੋਂ ਬਾਅਦ ਪਿੰਡ ਅੱਚਰਵਾਲ ਇੱਕ ਪਿੰਡ ਓਪਨ ਦੀ ਟੀਮ ਵਿੱਚ ਖੇਡਣਾ ਸ਼ੁਰੂ ਕੀਤਾ। 2001 ਵਿੱਚ ਗੁਰੂ ਗੋਬਿੰਦ ਸਿੰਘ ਕਬੱਡੀ ਅਕੈਡਮੀ ਕੋਟਲੀਥਾਨ ਸਿੰਘ ਵਿਖੇ ਪ੍ਰਸਿੱਧ ਕਬੱਡੀ ਖਿਡਾਰੀ ਬਲਵਿੰਦਰ ਫਿੱਡੂ ਦੀ ਰਹਿਨਮਾਈ ਹੇਠ ਕੋਚ ਸੁਖਮੰਦਰ ਸਿੰਘ ਬਰਾੜ (ਭਾਗੀਕੇ) ਤੋਂ ਕਬੱਡੀ ਦੇ ਦਾਅ ਪੇਚ ਸਿੱਖਣ ਲੱਗਿਆ। ਸਾਲ 2003 ਤੋਂ 2005 ਤੱਕ ਲਗਾਤਾਰ ਇੰਗਲੈਂਡ ਦੀ ਧਰਤੀ ‘ਤੇ ਖੇਡਣ ਜਾਂਦਾ ਰਿਹਾ। ਸਾਲ 2006 ਵਿੱਚ ਕੀਪਾ ਕੈਨੇਡਾ ਦੀ ਧਰਤੀ ‘ਤੇ ਖੇਡਣ ਗਿਆ ਅਤੇ ਉਸ ਸਾਲ ਤੋਂ ਉਹ ਪੰਜਾਬ ਵਿੱਚ ਸੰਤ ਈਸ਼ਰ ਸਿੰਘ ਕਬੱਡੀ ਅਕੈਡਮੀ ਰਾੜਾ ਸਾਹਿਬ ਦੀ ਟੀਮ ਵਿੱਚ ਖੇਡਦਾ ਆ ਰਿਹਾ ਹੈ। ਇਸ ਟੀਮ ਦੇ ਕੋਚ ਮਾਸਟਰ ਭੁਪਿੰਦਰ ਸਿੰਘ ਘਲੋਟੀ ਅਤੇ ਕਬੱਡੀ ਖਿਡਾਰੀ ਜਗਤਾਰ ਧਨੌਲਾ ਤੋਂ ਕਬੱਡੀ ਦੇ ਹੋਰ ਦਾਅ ਪੇਚ ਸਿੱਖ ਕੇ ਕਬੱਡੀ ਜਗਤ ਵਿੱਚ ਇਸ ਨੇ ਵੱਖਰੀਆਂ ਹੀ ਪੈੜਾਂ ਪਾਈਆਂ। ਇਸ ਸਾਲ ਪੰਜਾਬ ਦੇ 17 ਕਬੱਡੀ ਕੱਪਾਂ ਵਿੱਚ 38 ਮੈਚ ਖੇਡ ਕੇ 415 ਕਬੱਡੀਆਂ ਪਾ ਕੇ ਅਤੇ 1 ਅੰਕ ਕਾਮਨ ਕਰਕੇ ਕੁੱਲ 379.50 ਅੰਕ ਪ੍ਰਾਪਤ ਕਰਕੇ ਪੰਜਾਬ ਕਬੱਡੀ ਅਕੈਡਮੀ ਐਸੋਸੀਏਸ਼ਨ ਦੇ ਸਹਿਯੋਗ ਨਾਲ ਖੇਡਣ ਵਾਲੀਆਂ ਕਬੱਡੀ ਅਕੈਡਮੀਆਂ ਦੇ ਖਿਡਾਰੀਆਂ ਵਿੱਚੋਂ ਸਭ ਤੋਂ ਵੱਧ ਅੰਕ ਪ੍ਰਾਪਤ ਕਰਕੇ ਪੰਜਾਬ ਵਿੱਚ ਪਹਿਲਾ ਸਥਾਨ ਪ੍ਰਾਪਤ ਕੀਤਾ ਅਤੇ 6 ਕਬੱਡੀ ਕੱਪਾਂ ਵਿੱਚ ਵਧੀਆ ਧਾਵੀ ਦਾ ਖਿਤਾਬ ਵੀ ਜਿੱਤਿਆ। 2 ਫਰਵਰੀ 2008 ਨੂੰ ਕਪੂਰਥਲੇ ਦੇ ਕਬੱਡੀ ਕੱਪ ਤੇ ਕੀਪਾ ਸੱਦੋਵਾਲ ਅਤੇ ਤੇਜੀ ਪੂਨੀਆ ਨੂੰ ਸਾਂਝੇ ਤੌਰ ਵਧੀਆ ਧਾਵੀ ਚੁਣ ਕੇ ਇਨਾਮ ਵਿੱਚ ਮੋਟਰਸਾਈਕਲ ਵੀ ਦਿੱਤਾ ਗਿਆ। ਕੀਪਾ ਸੱਦੋਵਾਲ ਨੇ 17 ਕਬੱਡੀ ਕੱਪਾਂ ਵਿੱਚ ਕਿੱਥੇ-ਕਿੱਥੇ ਕਿੰਨੀਆਂ ਕਬੱਡੀਆਂ ਪਾਈਆਂ ਅਤੇ ਕਿੰਨੇ ਅੰਕ ਪ੍ਰਾਪਤ ਕੀਤੇ ਇਹ ਜਾਨਣ ਲਈ ਹੇਠਾਂ ਦਿੱਤੇ ਗਏ ਟੇਬਲ ਵਿੱਚ ਪੜ੍ਹੋ।